ⵉⵛⵛⵓ ⴷ ⵓⵖⵢⵢⵓⵍ ⵏⵏⵙ ⵉⵛⵇⵇⴰⵏ
ⵉⵛⵛⵓ ⴷ ⵓⵖⵢⵢⵓⵍ ⵏⵏⵙ ⵉⵛⵇⵇⴰⵏ
ⵉⵛⵛⵓ ⵉⴳⴰ ⵢⴰⵏ ⵓⵔⴳⴰⵣ ⴰⵎⴽⵔⴰⵣ, ⵉⵖⵣⵣⵉⴼⵏ ⴷⴰ ⵉⵜⵜⴰⵙⵉ ⴰⵇⵇⵔⴰⴱ ⵏⵏⵙ ⴰⵣⴳⴳⵯⴰⵖ ⴷ ⵓⵥⵏⵏⴰⵕ ⵏⵏⵙ ⴰⴱⵔⴽⴰⵏ, ⵉⵄⵣⵣⴰ ⵖⵓⵔⵙ ⴰⴷ ⵉⵙⵉⵣⴷⵉⴳ ⵜⵉⵎⵍⵙⴰ ⵏⵏⵙ ⵓⵍⴰ ⵓⴷⵎ ⴽⵓ ⴰⵙⵙ, ⴰⵢⵏⵏⴰⵖ ⴰ ⵎⵉ ⴷⴰ ⵉⵜⵜⵎⴰⵟⴰⵍ ⴷⴰⵜ ⵏ ⵜⵉⵙⵙⵉⵜ, ⴰⵔ ⵉⵙⵙⵉⵔⵉⴷ ⵓⴷⵎ ⵏⵏⵙ ⵓⵍⴰ ⵜⴰⴼⴳⴳⴰ ⵏⵏⵙ ⴽⵓ ⵉⵎⴰⵍⴰⵙⵙ, ⴰⵔ ⵉⵜⵜⵉⵏⵉ ⵢⴰⵏ ⵡⴰⵡⴰⵍ ⴰⵇⴱⵓⵕ ⵏⵏⴰ ⴳ ⵉⵏⵏⴰ :"ⵜⵉⵎⵍⵙⴰ ⴷ ⵉⵃⵔⵓⵢⵏ ⴰⴷ ⵉⴳⴰⵏ ⵉⵚⴼⵟⴰⵡⵏ ⵏ ⵉⵄⴷⴰⵡⵏ" ⴰⴼⴰⴷ ⴰⴷ ⵏⵔⵎⵙ ⴰⵡⴰⵍ ⴰⴷ ; ⵉⵏⵏⴰ ⴷⵉⴳⵙ ⵣⵄⵎⴰ ⵉⵙ ⵉⴼⵓⵍⴽⵉ ⵉ ⵡⴼⴳⴰⵏ ⴰⴷ ⵉⵍⵙⵙⴰ ⵜⵉⵎⵍⵙⴰ ⵉⵣⴷⴷⵉⴳⵏ ⴰⴼⴰⴷ ⴰⴷ ⵢⴰⵍⵉ ⵙ ⵡⵓⴷⴷⵓⵔ ⵏⵏⵙ ⴳ ⵡⴰⵍⵍⵏ ⵏ ⵡⵢⵢⴰⴹ.
ⵉⵍⵍⴰ ⵖⵓⵔⵙ ⵢⴰⵏ ⵓⵖⵢⵢⵓⵍ, ⵓⵍⴰ ⵏⵜⵜⴰ ⵉⵃⵍⴰ ⴽⵉⴳⴰⵏ, ⵉⵀⵢⵢⴰ ⵢⴰⵙ ⵜⴰⴱⴰⵔⴷⴰ ⵏⵏⵙ ⵜⴰⴼⵔⵇⴰⵛⵜ ⵉⵣⴷⴷⵉⴳⵏ ⵉⵃⵍⴰⵏ, ⵉⴳⴰ ⵓⵖⵢⵢⵓⵍ ⵣⵓⵏⴷ ⵎⵓⵎⵎⵓ ⵏ ⵜⵉⵟⵟ ⵏ ⵉⵛⵛⵓ.
ⴰⴱⴷⴰ ⵓⵔ ⴷⴰ ⴷⵉⴳⵙ ⵉⵜⵜⵀⵡⵓ, ⴷⴰ ⵢⴰⵙ ⵢⴰⴽⴽⴰ ⵜⵉⵎⵥⵉⵏ, ⵉⴼⴽ ⴰⵙ ⴰⵍⵉⵎ, ⵉⴼⴽ ⴰⵙ ⵜⵓⴳⴰ, ⴰⵔ ⵜ ⵉⵜⵜⴰⵡⵉ ⵙ ⵓⵍⵎⵓ ⴽⵓ ⴹⴰⵕⴰⵜ ⵜⵉⵣⵡⴰⵔⵏⵉⵏ. ⵉⴷⴷⵊⵉⵡⵏ ⵓⵖⵢⵢⵓⵍ, ⵢⵓⵍⵉ ⴷ ⵃⵊⵊⵉ ⵏⵏⵙ, ⴰⵏⵏⴰⵢⵏ ⵜ ⵎⵉⴷⴷⵏ ⵥⵕⴰⵏ ⵜ ⵉⴱⴷⴷⴰ ⵉⴷⵓⵙ. ⵉⵡⴰ ⴰⵔ ⵜ ⵉⴷ ⵜⵜⴻⵜⵜⵔⵏ ⴰⴼⴰⴷ ⴰⴷ ⵉⵙⵙ ⴰⵙⵉⵏ ⵜⵓⴳⴰ ⵏⵏⵙⵏ ⴷ ⵉⵥⴰⵥⴰⵜⵏ ⵏⵏⵙⵏ.
ⵉⵛⵛⵓ ⵢⴰⵖⵓⵍ ⴰⵔ ⵉⵜⵜⵕⵄⴰⴱ ⴰⵛⴽⵓ ⴰⵖⵢⵢⵓⵍ ⵏⵏⵙ ⴰⵔ ⵉⴽⴽⴰⵜ ⵙ ⵜⵉⵇⵇⴰⵔ ⵉⴷⴷⵖ ⵄⵏⵉⵖ ⵉⴷⴷⵊⵉⵡⵏ ⵜⵓⴳⴰ. ⵉⴷⴷⵊⵉⵡⵏ ⵜⵉⵎⵥⵉⵏ, ⵉⴷⴷⴰ ⴷⴰⵔⵙ ⴰⴷ ⴰⵙ ⵉⵕⵥⵎ ⴳ ⵓⵛⴱⴰⵕⵓ ⵉⴼⴽ ⴰⵙ ⴷ ⵜⵉⵇⵇⴰⵔ.
ⴽⵓ ⵜⵉⴽⴽⵍⵜ ⴳ ⴷ ⵉⵙⵇⵙⴰ ⴽⵔⴰ ⴱⴰⵛ ⴰⴷ ⵢⴰⵎⵥ ⴰⵖⵢⵓⵍ, ⴷⴰ ⴰⵙ ⵉⵜⵜⵉⵏⵉ ⵉⵛⵛⵓ : "ⵀⴰ ⵏⵏ ⴰⵖⵢⵢⵓⵍ ⵢⴰⵖⵓⵍ ⵉⵛⵇⵇⴰ, ⵀⴰⵜ ⴷⴰ ⵉⴽⴽⴰⵜ" ⵓⵔ ⵜ ⵓⵎⵉⵏⵏ ⵎⴷⴷⵏ ⵖⴰⵍⵏ ⵉⵙ ⴷ ⵜⵉⵃⵍⵍⴰⵍ ⵏⵖ ⴷ ⵉⵙⴽⵉⵔⴽⵉⵙⵏ...
ⵢⴰⵏ ⵡⴰⵙⵙ, ⵉⴳⴰⵏ ⴰⵙⵙ ⵏ ⵓⴳⴰⴷⴰⵣ, ⵉⵏⴽⵔ ⵉⵛⵛⵓ ⵉⵕⵥⵎ ⵉ ⵡⵖⵢⵢⵓⵍ ⵏⵏⵙ ⵙ ⵉⵖⵏⴰⵏ ⵡⴰⵅⵅⴰ ⴷⴰ ⵉⴽⴽⴰⵜ, ⵢⴰⵡⵉ ⵜ ⵙ ⵓⴳⴰⴷⴰⵣ ⵣⵓⵏⴷ ⵉⵔⴰ ⴰⴷ ⵜ ⵉⵣⵣⵏⵣ, ⵉⵇⵇⵏ ⵜ ⵙ ⵜⴳⴰⵜⵓⵜ ⴳ ⵓⴷⵖⴰⵔ ⴳ ⵏⵣⵣⴰⵏ ⵉⵎⵓⴷⴰⵔ.
ⵓⴽⴰⵏ ⴷⴰ ⴷ ⵉⵜⵜⴷⴷⵓ ⴽⵔⴰ ⴰⴷ ⵜ ⵉⵚⵓⵎ ⵏⵖ ⴷ ⴰⴷ ⵜ ⵉⵇⵍⵍⴱ, ⴷⴰ ⵜ ⵉⴽⴽⴰⵜ ⵓⵖⵢⵢⵓⵍ ⵉⵚⵎⵎⵔ ⵜ. ⵉⵎⴽⵉⵏⵏⴰⵖ ⴰⴷ ⵉⴳⴰ ⵍⵃⴰⵍ ⵙⴳ ⵜⵉⴼⴰⵡⵜ ⴰⵔ ⵜⵉⵣⵡⴰⵔⵏⵉⵏ, ⴽⵔⴰ ⵉⵇⵍⴱ ⴰⵙ, ⴽⵔⴰ ⵉⵚⵎⵎⵔ ⵜ, ⴽⵔⴰ ⵉⵥⴱⵕ ⵜ, ⴽⵔⴰ ⴰⵔ ⵉⵙⵎⵓⵎⵎⵓⵢ, ⵉⵡⴰ ⵉⴷⴷⵖ ⴰⵏⵏⴰⵢⵏ ⵉⵙⴱⴱⴰⴱⵏ ⴰⵖⵢⵢⵓⵍ ⵏ ⵉⵛⵛⵓ ⵉⵙ ⵉⵇⵊⵊⵔ ⴷ ⵉⵙ ⵉⵛⵇⵇⴰ, ⴷⴷⵓⵏ ⴷⴰⵔⵙ ⵏⵏⴰⵏ ⴰⵙ: " ⴰ ⵉⵛⵛⵓ, ⵀⴰ ⵏⵏ ⴰⵖⵢⵢⵓⵍ ⵏⴽ ⵓⵔ ⵉⵏⵏⵉ ⴰⴷ ⴰⴽ ⵉⵏⵣ!
ⵀⴰⵜ ⴽⵓⵍⵍⵓ ⵎⴰ ⴰⴷ ⵜ ⵉⵏⵏ ⵉⵏⵎⴰⵍⴰⵏ, ⵉⴼⴽⴰ ⴰⵙ ⵜⵉⵇⵇⴰⵔ!" ⵉⵏⵏⴰ ⴰⵙⵏ ⵉⵛⵛⵓ ;"ⵀⴰⵜ ⵙⵙⵏⵖ ⵉⵙ ⵉⵛⵇⵇⴰ ⴷ ⵉⵙ ⵉⵎⵙⵙⵓⵙ ⵓⵖⵢⵢⵓⵍ ⵉⵏⵓ, ⵙⵙⵏⵖ ⵉⵙ ⵉⵚⵟⵓⵢ, ⴰⵔ ⵉⴽⴽⴰⵜ ⵙ ⵜⵉⵇⵇⴰⵔ? ⵖⵉⵔ ⵔⵉⵖ ⴰⴷ ⵜⵉⵙⵉⵏⵎ ⵎⴰ ⴰⴷ ⵎⵉ ⵉⵚⴱⵕ ⵉⵛⵛⵓ ⴳ ⵓⵖⵢⵢⵓⵍ ⵏⵏⴰⵖ...
ⵜⴰⴼⴳⴳⴰ, ⵜⴰⴼⴽⴽⴰ, ⵜⴰⵖⵙⵙⴰ : الجسم - le corps
ⵉⵄⴷⴰⵡⵏ, ⵉⵛⵏⴳⵯⴰ : الاعداء - les ennemis
Aucun commentaire