ⴰⵔⴰⵢⴰⵜⴰⵖ ⵙ ⵜⵓⵜⵍⴰⵢⵜ ⵏⵏⵖ
ⴰⵔⴰⵢⴰⵜⴰⵖ ⵙ ⵜⵓⵜⵍⴰⵢⵜ ⵏⵏⵖ
ⴷⴰ ⵏⵙⵏⵉⵎⵎⵉⵔ ⵉⵊⵊⵉⴳⵏ ⴳ ⵜⴰⵔⵡⴰ ⵏ ⵉⵎⴰⵣⵉⵖⵏ ⵍⵍⵉ ⵙⴽⴰⵏⵉⵏ ⴰⵏⵙⴰⵢ ⴰⴷ : ⴰⴷ ⵜⵜⴰⵔⴰⵏ ⵙ ⵜⴰⵎⴰⵣⵉⵖⵜ, ⵖⴰⵙ ⵏⵜⵜⴰⵜ ⴳ ⵡⴰⵢⵢⵓⵔ ⴰⴷ .
ⵡⵉⴷ ⴷ ⵜⵉⴷ ⴼⵔⴽⵏ ⵉⵙ ⴷ ⵉⵎⴰⵣⵉⵖⵏ ⵀⵍⵍⵉ ⴰⴷ ⵉⵥⴹⴰⵕⵏ ⴰⴷ ⵙⵙⵉⴷⵔⵏ ⵜⵓⵜⵍⴰⵢⵜ ⵏⵏⵙⵏ ⴷ ⵢⵉⴷⵍⵙ ⵏⵏⵙⵏ, ⵓⵔ ⴷ ⵜⴰⵏⴱⴰⴹⵜ.
ⵓⴳⴳⵯⴰⵔ ⵏ ⵎⴽ ⴰⵏⵏ, ⴰⴱⵓⵖⵍⵓ ⵏ ⵜⵎⵓⵔⵜ ⵏⵏⵙⵏ ⴰⴽⴽⵯ ⵉⵍⵍⴰ ⴳ ⵉⴼⴰⵙⵙⵏ ⵏⵏⵙⵏ, ⵡⵉⵢⴰⴹ, ⵎⵍⴰⵏ, ⵡⵓⵙⵙⴰⵏ ⵉⵙ ⴷ ⵜⵓⴳⵜⵜ ⴳⵉⵙⵏ ⴳⴰⵏ ⵣⵓⵏ ⴷ ⵡⴰⵍⵍⵉ ⵉⵙⵙⵓⴽⵓⴼⵏ ⴰⴷⴷⴰⴳ ⵅⴼ ⴰⴷ ⵉⵙⵔⵎ ⵉⵎⴰⵍⴰⴳⵏ ⵏⵏⵙ!
ⴳ ⵎⵏⵏⴰⵡ ⵉⵙⴳⴳⵯⴰⵙⵏ ⴰⴷ ⵉⴳⴳⵯⵔⴰⵏ, ⵍⵍⵉⵍⵏ ⴷ ⵎⵏⵏⴰⵡ ⵜⴰⵔⵡⴰ ⵏ ⵉⵎⴰⵣⵉⵖⵏ ⵎⴰⵜⵙⵏ ⵍⵍⵉ ⵉⴳⴰⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵙⵙⵏⵜⴰⵏ ⴰⵙⵙ ⴰⴷ ⴰⵔ ⵜⵜⵔⴰⵏ ⵉⴹⵕⵉⵚⵏ ⵙ ⵜⵉⵏⵏⵙⵏ.
ⵜⵓⴳⵜⵜ ⵏ ⵎⵉⴷⴷⵏ ⵏ ⵓⵎⵓⵙⵙⵓ ⴰⵎⴰⵣⵉⵖ ⴷⴰⵔⵙⵏ ⵜⴰⵏⵖⵉⵎⴰⵍⵜ(pessimisme) ⵣⴳ ⵉⵎⴰⵍ ⵏ ⵜⵎⴰⵣⵉⵖⵜ, ⵓⵔ ⵊⵊⵓⵏ ⴳⵉⵙⵏ ⴳⵉⵖ, ⴰⵛⴽⵓ ⵡⵉⵏⵏ ⴷⴰ ⴽⴽⵔⴼⵏ ⵉⵅⴼⴰⵡⵏ ⵏⵏⵙⵏ ⵙ ⵉⵅⴼⴰⵡⵏ ⵏⵏⵙⵏ, ⴷⴰ ⵜⵜⴰⵏⵏⴰⵢⵏ ⵎⴰⴷ ⵜⵙⴽⵔ ⵜⵏⴱⴰⴹⵜ, ⴷ ⵎⴰⴷ ⴳⴰⵏ ⵉⵙⵏⴼⴰⵔⵏ ⵏ ⵜⵏⴱⴰⴹⵜ, ⴷ ⵜⵖⴷⵓⵙⵜ ⵏ ⵏⴱⴱⴰⴹⵏ ⵍⵍⵉ ⵉⵍⵍⴰⵏ ⵅⴼ ⵓⵙⴽⴽⵉⵏ ⴰⵎⴰⵣⵉⵖ...ⵎⴰⵛ ⵓⵔ ⴰⵔ ⵥⵕⵕⴰⵏ ⴰⵢⵍⵍⵉ ⵙ ⵣⵎⵔⵏ ⴰⴷ ⵜ ⵙⴽⵔⵏ ⵏⵜⵜⵏⵉⵏ,
ⴰⵔ ⵙⵏⵢⵓⴷⴷⵓⵏ ⵜⴰⵏⵖⵉⵎⴰⵍⵜ ⵏⵏⵙⵏ ⴳⵔ ⵡⵉⵢⴰⴹ, ⴰⵔ ⵙⵙⵉⵡⵉⴷⵏ ⵡⵉⵍⵍⵉ ⵢⴰⴷ ⵉⵙⵙⵏⵏ ⵉⵙ ⴷ ⵜⴰⵎⴰⵣⵉⵖⵜ ⵉⵖ ⵜⴳⴰ ⵜⴰⵎⴰⵙⴰⵢⵜ ⵏ ⵜⵏⴱⴰⴹⵜ, ⵀⴰⵜ ⵜⴳⴰ ⵜⵉⵏ ⵉⴳⴷⵓⴷⵏ ⵉⵎⴰⵣⵉⵖⵏ ⵓⴳⴳⴰⵔ.
ⵡⵉⴷ ⵓⵔ ⴰⵔ ⵣⵕⵕⴰⵏ ⵜⴰⵍⴰⵍⵉⵜ ⵏ ⵓⵏⴰⵔⵓⵣ ⴳ ⵓⵍⴰⵡⵏ ⵏ ⵜⴰⵔⵡⴰ ⵏ ⵜⵎⴰⵣⵖⴰ, ⴰⵏⴰⵔⵓⵣ ⴰⴷ ⵍⵍⵉ ⴷ ⵉⵏⵙⵙⵉⵙⵏ ⵎⵇⵇⴰⵔ ⴷⴰⵔ ⵡⵉⵍⵍⵉ ⵎⵎⵉ ⵜⵏⵖⵓⴱⴰ ⵜⵓⵜⵍⴰⵢⵜ ⴳ ⵜⵎⵓⵔⴰ ⵏⵏⵙⵏ ⵣⴳ ⵣⵉⴽ, ⴰⵢⵜⵎⴰⵜⵏⵖ ⵉⵜⵓⵏⵙⵉⵢⵏ ⴷ ⴰⵢⵜ ⵜⴳⵣⵉⵔⵉⵏ ⵜⵉⴽⵏⴰⵔⵉⵢⵉⵏ ⴷ ⵡⵉⵢⴰⴹ ⴳ ⵜⵎⵉⵣⴰⵔ ⵏ ⵓⵎⴰⴹⴰⵍ, ⵍⵍⵉ ⴳ ⵍⵍⴰⵏ ⵜⴰⵔⵡⴰ ⵏ ⵉⵎⴰⵣⵉⵖⵏ , ⵓⵔ ⵔⵉⵏ ⴰⴷ ⴼⵙⵉⵏ.
ⴰⵢⵢⵓⵣ ⵏⵏⵓⵏ ⴰ ⵉⵊⵊⵉⴳⵏ ⵏ ⵜⵎⴰⵣⵉⵖⵜ, ⵡⵉⵍⵍⵉ ⵉⴼⵍⵙⵏ ⵉⵙ ⴷ ⵏⵜⵜⵏⵉ ⴰⴷ ⵔⴰⴷ ⵜⵜ ⵉⵊⵊⵏⵊⵎ, ⵉⵊⵊⵏⵊⵎ ⴷⵉⵙ ⵜⴰⵎⴰⵣⵖⴰ.
ⵎⵓⵃⵎⵎⴰⴷ ⴰⴽⵓⵏⴰⴹ
ⴳ ⵓⴼⵉⵙⴱⵓⴽ
Aucun commentaire